Ábendingar um svik færri en áður

„Ábendingunum hefur aðeins fækkað frá því sem var þegar átakið var fyrst kynnt að ráði. Þá fengum við tæplega hundrað ábendingar, enda var auglýsingaherferð sett af stað,“ segir Gissur Pétursson, forstjóri Vinnumálastofnunar. Milli sextíu og sjötíu ábendingar um atvinnuleysisbótasvik bárust stofnuninni í ágúst. Síðan í maí hefur fólki gefist tækifæri til að leggja inn nafnlausar ábendingar til Vinnumálastofnunar og Ríkisskattstjóra um svik á vinnumarkaði.

Átakið, sem er unnið í samstarfi Ríkisskattstjóra og Vinnumálastofnunar, var kynnt rækilega í júlímánuði. Yfirlýst markmið átaksins er að skapa almennt aðhald á vinnumarkaði og hafa áhrif til varnaðar á fólk og fyrirtæki ásamt því að finna þá sem brotið hafa af sér. Átakið snýr bæði að einstaklingum og fyrirtækjum.

Að sögn Gissurar reynast langflestar ábendingar sem berast varðandi einstaklinga, sem grunur leikur á að þiggi atvinnuleysisbætur þrátt fyrir að vera í vinnu, ekki á rökum reistar. „Þegar um fyrirtæki er að ræða þurfum við að heimsækja þau sem ábendingar berast um. Einnig beitum við óundirbúnum heimsóknum. Til að mynda heimsótti teymi frá okkur ein fimmtán fyrirtæki á Laugaveginum í vikunni. Margir fyrirtækjaeigendur eru ánægðir með að fá okkur í heimsókn, til að staðfesta að allt sé í góðu lagi, og einnig til að fólk fái tilfinningu fyrir því að eitthvert eftirlit eigi sér stað,“ segir Gissur Pétursson.