Mansalsmálið klárað fyrir árslok

Embætti ríkissaksóknara stefnir að því að klára hið svokallaða mansalsmál fyrir 30.desember, en þá rennur út gæsluvarðhald yfir fimm Litháum sem handteknir voru í tengslum við málið. Rannsókn hefur verið hætt á þætti allra íslendinganna sem handteknir voru í málinu, að einum undanskildum.

Málið kom fyrst upp þegar stúlka frá Litháen trylltist um borð í flugvél á leið hingað til lands og sagðist fórnarlamb mansals. Viðamikil rannsókn fór strax í gang sem endaði með því að fimm Litháar voru handteknir og einhverjir íslendingar sátu um tíma í varðhaldi.

Í lok nóvember lauk síðan rannsókn lögreglunnar á suðurnesjum á málinu og það var sent til ríkissaksóknara, sem metur nú hverjir eða hvort einhver verði ákærður í málinu.

Samkvæmt upplýsingum frá embættinu er málið nokkuð flókið úrlausnar enda fyrsta mál sinnar tegundar sem upp kemur hér á landi. Það er að segja að fórnarlamb mansals sé tekið við landamæri landsins.

Einnig eru þeir sem taldir eru stærstu gerendurnir í málinu allir erlendir ríkisborgarar sem gerir það að verkum að afla verður hluta gagna erlendis frá. Stefnt er hinsvegar að því að klára málið fyrir 30.desember eins og fyrr segir.