Hefur breytt viðhorfum til fatlaðra

Embla Ágústsdóttir er handhafi Kærleikskúlunnar 2009. Styrktarfélag lamaðra og fatlaðra afhenti Kærleikskúluna, sem nefnist Snerting og er eftir Hrein Friðfinnsson, í Listasafni Reykavíkur í gærmorgun.

„Kærleikskúlan er veitt framúrskarandi fyrirmynd á ári hverju. Okkur hjá Styrktarfélaginu þykir Embla hafa skarað fram úr á árinu með því að vekja athygli á málefnum fatlaðra en einnig með því að hvetja fólk til þess að hafa trú á eigin getu,“ segir í tilkynningu Styrktarfélagsins.

„Embla hefur á engan hátt látið hreyfihömlun sína hindra sig í að lifa lífinu til fulls og ná háleitum markmiðum sínum í námi og starfi. Með því að miðla af reynslu sinni og lífssýn hefur hún unnið að því að breyta viðhorfum til fatlaðra og fengið fólk til að skilja að þó að hreyfihömlun sé sannarlega áskorun sé hún ekki endilega hindrun eða afsökun,“ sagði María Ellingsen leikkona þegar hún afhenti Emblu Kærleikskúluna í gær.

Í ræðu sinni fjallaði María meðal annars um mikil­vægi kærleikans og rifjaði upp að hann hefði verið valinn á þjóðfundinum 14. nóvember síðastliðinn sem eitt þeirra gilda sem þjóðin vildi hafa að leiðarljósi í samfélaginu. - óká