Fyrstu myndirnar sýndu lítið

Bandarískt geimfar brotlenti á suðurpól tunglsins í gær. Harkaleg lendingin var vel skipulögð og taldist vel heppnuð. Um borð í geimfarinu eru mælitæki sem ætlað er að finna ummerki vatns á tunglinu.

„Þetta er svo flott,“ sagði Jennifer Heldmann hjá bandarísku geimferðastofnuninni NASA, sem sendi tunglfarið í þennan leiðangur. „Við erum himinlifandi.“

Nokkur vonbrigði voru þó að fyrstu myndirnar frá tunglfarinu reyndust ekki jafnt áhrifaríkar og vonast hafði verið til.

„Við sáum gígmyndun, við sáum ljósblossa, svo eitthvað hlýtur að hafa gerst þarna á milli,“ sagði Anthony Coloprete, einn vísindamannanna sem stóðu að geimskotinu.

Vonast var til að myndir næðust af rykstrók, sem væntanlega hefur myndast þegar tunglfarið skall á tunglinu. Hugmyndin var sú að vísindamennirnir myndu nota tæki sín til að greina efnainnihald stróksins í von um að sjá þar ummerki vatns.

Vísindamennirnir hugguðu sig þó við að allur tækjabúnaðurinn virtist virka eðlilega. Næstu vikur og mánuðir verða svo notaðir til að greina það sem þó sást.

„Þetta mun breyta því hvernig við sjáum tunglið,“ sagði Michael Wargo, yfirtunglfræðingur hjá NASA.- gb