Óskiljanlegt að meina Landsvirkjun orkusölu til Helguvíkur

Burðarstöplar mynda nú útlínur fyrsta áfanga kerskálanna en þarna er áformað að hefja álframleiðslu eftir tvö og hálft ár. En kerskálar eru til lítils gagns nema orka fáist og það mikil.

Hitaveita Suðurnesja, eða HS Orka, hyggst stækka Reykjanesvirkjun og ráðast í tvær nýjar jarðhitavirkjanir, í Eldvörpum og við Krýsuvík, og virkja þannig allt að 250 megavött. Orkuveita Reykjavíkur leggur annað eins til með virkjunum á Hellisheiði. Það dugar hins vegar ekki.

Júlíus Jónsson, forstjóri HS Orku, segir að 150 megavött eða svo standi út af sem verði að koma annarsstaðar frá, eigi að standa við fyrirliggjandi tímaramma. Aðeins einn aðili, Landsvirkjun, geti útvegað það sem á vanti. Síðasta ríkisstjórn ákvað hins vegar að Landsvirkjun kæmi hvergi nærri Helguvíkurálveri.

"Ég skil ekki slíkar yfirlýsingar. Afhverju eitt fyrirtæki ætlar ekki að vera í einhverjum ákveðnum bransa en önnur eiga þá að vera í honum. Stjórnvöld verða náttúrlega að ákveða það og ráða því. En ég skil það ekki," segir Júlíus.

Forstjóri Norðuráls, Ragnar Guðmundsson, er varkár þegar hann er spurður hvort aðkoma Landsvirkjunar sé nauðsynleg og segist vera með ágæta samninga við Orkuveitu Reykjavíkur og Hitaveitu Suðurnesja.

Norðurálsmenn hafa stefnt að því að ræsa síðasta áfangann árið 2015 eða 2016 en viðurkenna óvissu. Ragnar segir það fara eftir orkuafhendingu hvaða tímasetningar verði á seinni áföngum. Norðurál leggi hins vegar á það áherslu á að byggja álverið upp í samfellu þannig að ekki þurfi að senda verktaka heim á milli áfanga.