Penn sækir um skilnað

Sean Penn hefur óskað eftir skilnaði frá eiginkonu sinni til þrettán ára, Robin Wright Penn. Þetta er í annað sinn á tveimur árum sem parið fer þessa leið en að þessu sinni virðist leikaranum vera full alvara. Hann ku hafa lagt inn beiðni til dómsyfirvalda og er því málið komið í þar til gerðan farveg.

Mikla athygli vakti á þessu ári þegar Penn tók við Óskarsstyttunni fyrir besta leik í aðalhlutverki að hann þakkaði eiginkonu sinni ekki fyrir sig eins og venja er til. Þetta var olía á eldinn hjá Gróu á Leiti og ekki skánaði ástandið þegar Penn var sagður hafa átt í stuttu ástarsambandi við leikkonuna Natalie Portman. Penn var síðan gripinn glóðvolgur í fyrra með tveimur léttklæddum yngismeyjum á hótelherbergi ansi vel í glasi en þá voru hann og Robin í stuttu sumarleyfi. Síðan þá hefur verið æði stirt milli þeirra hjóna og nú virðast þau loks hafa gefist upp á sambandinu. Sean og Robin eiga tvö börn; átján ára gamla dóttur og fimmtán ára gamlan son.