Fjölbýlishús rýmt eftir reyk úr ruslalúgu

Fjölbýlishús að Flúðaseli 91 í Breiðholti var rýmt um klukkan þrjú í dag eftir að tilkynning barst um reyk í ruslageymslu hússins.

Einn íbúinn hafði opnað ruslalúgu og reykur borist upp úr henni. Þegar nánar var að gáð reyndist ruslageymslan full af reyk sem barst um stigagang hússins og logaði eldur í einni tunnunni. Slökkviliðið á höfuðborgarsvæðinu sendi tvo reykkafara inn í húsið sem slökktu eldinn. Slökkvilið reykræstir nú stigagang hússins og kannar hvort reykur hafi borist inn í íbúðir.

Íbúi hússins sem starfar sem dagmóðir var með tvö börn hjá sér þegar reykurinn tók að fylla húsið og hljóp með þau út á harðaspretti. Á henni var að heyra að subbulegt væri umlits eftir reykmettunina.