Búist við betri endurheimtum

Gera má ráð fyrir að eigendur skuldabréfa gamla Kaupþings endurheimti 35 prósent af kröfum úr búi bankans. Gangi það eftir verða heimtur tæpum 46 prósentum yfir núverandi mati skilanefndar Kaupþings. Þetta kemur fram í nýrri greiningu IFS Greiningar og Saga Capital á mati á heimtum úr búi Kaupþings.

Líkt og áður hefur verið greint frá hefur líflegur markaður verið með skuldabréf Glitnis og Kaupþings frá falli þeirra fyrir ári og virði þeirra rokið upp.

Sem dæmi skiptu skuldabréf gamla Kaupþings um hendur með 92 prósenta afslætti í byrjun júní. Talið er að 24 prósent krafna endurheimtist nú en það jafngildir tvö hundruð prósenta ávöxtun á rúmum fjórum mánuðum. Gangi nýja matið eftir er ávöxtunin tæp 340 prósent.

Helst eru það erlendir fjárfestar og sjóðir sem keypt hafa bréfin af evrópskum bönkum og fjármálafyrirtækjum. Eftir því sem næst verður komist er fátítt að íslenskir fjárfestar kaupi bréfin. Skuldabréfin eru nær öll í erlendri mynt.

„Við gerum ráð fyrir að skilanefndin fari afar varlega í mati sínu,“ segir Ómar Sigtryggsson, framkvæmdastjóri markaðsviðskipta hjá Saga Capital, spurður um ástæðu munarins á þessu nýja mati og því sem skilanefnd Kaupþings hefur gefið út. - jab