Leikarar í fári vegna leka af fjöldapóstlista

„Það var stjórnarfundur hjá félaginu í morgun [í gær] og það sem þar fór fram er trúnaðarmál,“ segir Björn Ingi Hilmarsson stjórnarmaður í Félagi íslenskra leikari (FIL).

Fréttablaðið sagði af afar mikilli óánægju sem birtist í bréfi sem Edda Björgvinsdóttir setti á póstlista FIL þar sem hún varaði leikara við að tala við „vafasama prentmiðla” og á þar vísast við DV. Edda segir: „...það er komið algjörlega aftan að ykkur, þið gerð að fíflum og niðurlægð með samhengislausum, heimskulegum og villandi forsíðutexta og ömurlegum fyrirsögnum.“ Í öðru bréfi Eddu, sem Björn Ingi sendi áfram á póstlistann, undrast hún mjög að bréfið hafi ratað til fjölmiðla og vill meina að í örfrétt blaðisins þar sem vakin er athygli á óánægju sem birtist í fyrra bréfi sé gert lítið úr henni. Björn Ingi undrast mjög að þessi bréf séu í höndum Fréttablaðsins og telur um trúnaðarmál að ræða.

Í seinna bréfi Eddu ítrekar hún þá skoðun sína að fjölmiðlar bókstaflega níðist á leikurum: „Við vitum öll um afar marga í okkar stétt sem hafa verið niðurlægðir oftar en einu sinni á forsíðum og baksíðum blaða og tímarita þegar þeir hafa látið tilleiðast að leyfa fjölmiðlafólki að opna sálarkirnur sínar, í þeirri von að vakin verði athygli á einhverju leikverki, bíómynd, námskeiði etc. sem okkur er uppálagt að standa við bakið á, m.a. með því að þiggja viðtöl í hinum ýmsu fjölmiðlum,“ skrifar Edda.

Í klausu sem fylgir bréfinu upplýsir Björn Ingi félagsmenn um að málið verði tekið fyrir á stjórnarfundi. Í samtali við Fréttablaðið vill hann ekki upplýsa hvort ályktunar og/eða aðgerða sé að vænta frá félaginu. Hann lýsti jafnframt þeirri skoðun sinni að hann teldi fjöldapóst til félagsmanna FIL vera einkamál.