Ámælisvert að viðskiptanefnd hafi ekki verið gerð grein fyrir hótunarbréfinu

Formaður viðskiptanefndar segir það ámælisvert að nefndinni hafi ekki verið gerð grein fyrir hótunarbréfi þýskra stjórnvalda áður en hún samþykkti lagabreytingu sem heimilar að þýskum Edge innistæðueigendum verði greitt fyrr en ella. Í bréfinu var ýjað að því að ef þjóðverjar fengu ekki greitt hið snarasta myndu þýsk stjórnvöld beita sér í viðræðum íslendinga við evrópusambandið og alþjóða gjaldeyrissjóðinn.

Viðskiptanefnd Alþingis samþykkti fyrir helgi breytingar á lögum um fjármálafyritæki. Lagabreytingingunni var hraðað í gegn um Alþingi en með henni fékkst heimild til að greiða út þýskar Edge innistæður Kaupþings.

Það var ekki fyrr en eftir að lagabreytingin hafði verið samþykkt að nefndarmenn heyrðu fyrst af bréfi sem skilanefnd Kaupþings barst nýlega frá þýska fjármálaráðuneytinu. En í því var ýjað að því að ef þjóðverjar fengu ekki greitt hið snarasta myndu þýsk stjórnvöld beita sér í viðræðum íslendinga við evrópusambandið og alþjóða gjaldeyrissjóðinn.

Nefndarmenn voru ekki sáttir við að heyra af málinu í fjölmiðlum en ekki inn í nefndinni. Álfheiður Ingadóttir formaður viðskiptanefndar hefur óskað eftir afriti af bréfinu og mun leggja það fram á fundi viðskiptanefndar á miðvikudag.

Fréttastofa náði tali af Gylfa Magnússyni viðskiptaráðherra í dag og sagði hann sit mat að ekkert í bréfinu mætti túlka sem hótun í garð íslendinga þar væri aðeins lýst áhyggjum þýskra stjórnvalda af því hversu hægt gengi að greiða þýskum innistæðueigendum peningana sína.