Hefði viljað sjá hótunarbréf þýskra stjórnvalda

Lilja Mósesdóttir þingmaður vinstri grænna tekur undir með Guðlaugi Þór Þórðarsyni sem kvartaði undan því í fréttum Stöðvar 2 um helgina að hótunarbréf þýskra stjórnvalda vegna Edge reikninganna hefði ekki verið lagt fram í viðskiptanefnd.

Lilja og Guðlaugur sitja bæði í nefndinni sem samþykkti lagabreytingu fyrir helgi sem heimiliar að þýskum Edge innistæðueigendum verði greitt fyrr en ella hefði orðið. Lagabreytingunni var hraðað í gegn um Alþingi og Guðlaugur Þór hefur spurt hvort meintar hótanir þýskra stjórnvalda um að þau beiti sér í viðræðum íslendinga við evrópusambandið hafi ráðið för við lagabreytinguna.

Lilja Mósesdóttir sagði í samtali við fréttastofu í morgun að hún hefði líka viljað vitað af bréfinu áður en hún tók þátt í að samþykkja lagabreytingina. Hún heyrði fyrst af hótunarbréfinu í fréttum stöðvar 2 á föstudaginn.

Hún segist þó ekki trúa því að bréfið eitt og sér hafi ráðið gangi máli við lagabreytinguna heldur hafi aðrir hagsmunir verið að baki. Til að mynda ákvæði í lagabreytingunum sem gerir það að verkum að hægt sé að greiða starfsmönnun íslenskra fjármálafyritækja í bretlandi umsamin laun.

Ekki náðist í viðskiptaráðherra fyrir fréttir.