Seðlabankastjóri skammar forsætisráðherra

Eiríkur Guðnason, seðlabankastjóri, skammar Jóhönnu Sigurðardóttir, forsætisráðherra í bréfi sem hann sendi henni í dag.

Í bréfinu lýsir Eiríkur furðu sinni á vinnubrögðum og yfirlýsingum i sambandi við stjórnskipulagsbreytingar á Seðlabankanum. Í stað þess að sinna brýnum verkefnum í peningamálum og gjaldeyrismálum hafi miklum tíma verið eytt í óþarfa síðustu vikur að hans mati.

,,Haft var eftir yður að skipulagsbreyting sú sem felst í Seðlabankafrumvarpinu sé ,,undirstaðan undir ýmislegt sem að við erum að glíma við i efnahagsmálunum"," segir Eiríkur og bætir við að það sé furðuleg yfirlýsing í ljósi þeirra tafa sem orðið hafa að undanförnu.

Eiríkur segir að frestur sem viðskiptanefnd Alþingis veitti Seðlabankanum til að vinna umsögn um frumvarpið hafi verið óeðlilega skammur. Sömuleiðis hafi það valdið töfum að lykilmönnum hafi verið vikið til hliðar og nefnir Ingimund Friðriksson, fyrrverandi seðlabankastjóra, í því samhengi.

,,Það er gríðarlega mikilvægt að tóm gefist til að sinna brýnum verkefnum í stað þess dreifa athyglinni eins og gert hefur verið með óvönduðum vinnubrögðum varðandi skipulag Seðlabankans og óviðeigandi yfirlýsingum í tengslum við það," segir Eiríkur.