Sigmundur sparar Alþingi rúmlega 600 þúsund á mánuði

Þegar Sigmundur Davíð Gunnlaugsson sigraði Höskuld Þórhallsson í baráttunni um formannsstól Framsóknarflokksins sparaði það Alþingi 624 þúsund krónur á mánuði. Fráfarandi formaður, Valgerður Sverrisdóttir, er þingmaður og reglur segja til um að formenn stjórnmálaflokka á Alþingi fái 50 prósent álag ofan á þingfararkaup sitt.

Að auki var Valgerður með aðstoðarmann á fullu þingfararkaupi en óbreyttir þingmenn eiga bara rétt á aðstoðarmanni í 30 prósent starfi. Þetta gerir samtals 624 þúsund krónur á mánuði.

Þar sem Sigmundur Davíð situr ekki á þingi fellur þessi kostnaður niður, að minnsta kosti þangað til og ef hann nær kjöri á Alþingi.