Hver sjóður kaupi lítinn hlut í HS Orku

Lífeyrissjóðir eru taldir ólíklegir til að vilja eiga stóran hlut í HS Orku, komi til þess að opinberir aðilar taki sig saman um kaup á 55 prósenta hlut Geysis Green Energy í félaginu.

Fjármálaráðuneytið og iðnaðarráðuneytið munu á næstu dögum setja saman viðræðuhóp ríkisins, lífeyrissjóðanna, Grindavíkur­bæjar og fleiri aðila um samstarf um eignarhald á HS Orku. Kannaðar verða forsendur þess að ganga til samninga við Geysi Green Energy um kaup á meirihlutaeign þess félags. Stjórnvöld leggja áherslu á aðkomu sterkra eigenda að HS Orku svo það geti gegnt stóru hlutverki í atvinnuuppbyggingu.

Samkvæmt heimildum Fréttablaðsins er talið ólíklegt að lífeyris­sjóðirnir séu tilbúnir að setja verulega fjármuni í eitt félag. Auk þess takmarkast fjárfestingargeta hvers lífeyrissjóðs við lög um lífeyrissjóði sem banna fjárfestingar umfram tuttugu prósent í óskráðum félögum. Eftir hrunið var lögum breytt þannig að fjárfestingarhlutfallið var hækkað úr tíu prósentum. Ástæðan var að svo mörg félög hefðu dottið út úr kauphöllinni og fleiri óskráð félög yrðu á ferðinni sem hugsanlegur fjárfestingarkostur fyrir lífeyrissjóðina. Vegna þessa er talið útilokað að einstakir lífeyrissjóðir nýti takmarkaða fjárfestingarheimild í eitt eða fá fyrirtæki.

Steingrímur J. Sigfússon fjármálaráðherra hefur sagt að ríkis­sjóði verði seint beitt til kaupa á hlut GGE. Hann útilokar ekki að leitað verði til almennings með fjármögnun slíkra kaupa. „Það er allt of snemmt að segja nokkuð um það,“ sagði Steingrímur í gær, spurður hvað ríkið væri tilbúið að teygja sig langt í kaupum á hlut GGE í HS Orku.

Heimildarmenn Fréttablaðsins eru sammála um að aðkoma ríkisins hljóti að verða í gegnum ríkisbankana; Íslandsbanki og Landsbanki eigi hagsmuna að gæta nú þegar vegna eignarhluta þeirra í GGE. Það sama á við um fjóra til sex lífeyrissjóði sem eiga fjörutíu prósent í Glacier Renewable Energy Fund, sem aftur á stóran hlut í GGE. Í nýrri fimm manna stjórn GGE eru fulltrúar lífeyris­sjóða, Landsbanka og Íslandsbanka auk verkfræðistofunnar Mannvits.

Hlutur GGE, sem er um 55 prósent, er metinn á um tuttugu milljarða króna ef forsendur samnings Magma Energy og Orkuveitu Reykjavíkur er hafður til hliðsjónar.

svavar@frettabladid.is