FME verndi uppljóstrara

Fjármálaeftirlitinu verður heimilt ef nýtt frumvarp viðskiptaráðherra verður samþykkt að lækka eða fella niður sektir og falla frá kæru á hendur fólki sem afhendir eftirlitinu gögn eða veitir því upplýsingar sem gætu varpað ljósi á bankahrunið og lögbrot á fjármálamarkaði.

Frumvarpið er hugsað til verndar uppljóstrurum, það er fólki sem býr yfir upplýsingum sem gætu gagnast Fjármálaeftirlitinu við rannsókn á bankahruninu en gæti veigrað sér við að láta eftirlitinu upplýsingarnar í té af ótta við að fá á sig sekt eða kæru.

Frumvarpinu var dreift á Alþingi í gær og mun Gylfi Magnússon viðskiptaráðherra mæla fyrir því eftir hádegi í dag. Frumvarpið er liður í viðleitni ríkisvaldsins til að auka líkur á því að menn stigi fram með upplýsingar sem gætu liðkað fyrir rannsókn á hruninu. Víða í kerfinu er verið að auka heimildir til að ná þessu marki, en sambærilegar heimildir hafa verið til staðar fyrir Samkeppniseftirlitið til að fólk upplýsi um brot á samkeppnisreglum.

Til að ná fram auknum heimildum fyrir Fjármálaeftirlitið þarf breytingar á ýmsum lögum sem allar snúa að því að eftirlitinu verði heimilt að falla frá sektum ef fyrirtæki eða einstaklingur er fyrstur til að láta eftirlitinu í té upplýsingar eða gögn sem geti leitt til rannsóknar eða sönnunar á broti.

Fjármálaeftirlitinu er einnig heimilt að lækka sektir á hendur mönnum ef viðkomandi hefur haft frumkvæði að því að láta eftirlitinu í té upplýsingar eða gögn telji FME að upplýsingarnar séu mikilvæg viðbót við þau sönnunargögn sem það hefur þegar í fórum sínum.