Atburðir dagsins við alþingishúsið

Umsátursástand ríkti við Alþingi í dag þar sem um þúsund manns mættu til að krefjast þess að ríkisstjórnin víki. Mikil reiði var í fólkinu og handtók lögregla á annan tug mótmælenda. Lillý Valgerður Pétursdóttir fylgdist með mótmælunum í allan dag.

Hópur fólks safnaðist saman við Alþingishúsið þegar klukkan var að verða eitt þegar Alþingi kom aftur saman til fundar eftir jólafrí. Lögregla stengdi borða fyrir framan húsið til að koma í veg fyrir að fólk færi að húsinu, þeir dugðu skammt.

Fólkið barði potta og pönnur og reyndi að búa til sem mest læti. Mótmælin voru hávær og kröfurnar skýrar sem fyrr. Stjórnvöld burt.

Erfitt var að gera sér grein fyrir hversu margir voru á svæðinu þar sem hópurinn dreifðist en áætla má að þeir hafi allavega verið hátt í eitt þúsund.

Fljótlega klauf hópur sig út úr og fór inn í Alþingisgarðinn. Þar barði fólkið á glugga og tók lögreglan sér þá stöðu við gluggana.

Þegar leið á breiddust út nokkur átök milli lögreglu og mótmælenda og handtók lögregla þá nokkra.. Lögreglu tókst þó ekki að flytja þá strax af svæðinu. Sérsveitarmenn mættu á svæðið. Hópurinn var beðinn að færa sig og þegar hann varð ekki við þeirri beiðni notaði lögreglan piparúða. Nokkur hópur þurfti að leita aðhlynningar eftir að hafa hafa fengið úðann í augun en þeirra á meðal voru ljósmyndarar sem voru að taka myndir af atburðarásinni.

Lögregla hélt þeim sem voru handteknir við húsið. Hjá þeim var líka ungur strákur en barnaverndaryfirvöld voru kölluð til vegna hans.

Nokkur pattstaða myndaðist svo um tíma þar sem mótmælendur stóðu sem fastast og hvorki þeir né lögregla vildu færa sig.

Þeir sem handteknir voru voru fluttir í gegnum Alþingishúsið niður í bílageymslu þar sem flytja átti þá burt. Það gekk hins vegar hægt þar sem fólk hafði komið sér fyrir við hliðið að kjallaranum.