Í samstarf með Gabriel

Tónlistar- og samfélagssíðan Gogoyoko.com hefur hafið samstarf við fimm alþjóðleg góðgerðarsamtök. Þar á meðal eru samtökin Witness sem tónlistarmaðurinn Peter Gabrel stofnaði árið 1992. Þau nota myndbandsupptökur og möguleika á netinu til að opna augu heimsins fyrir mannréttindabrotum. Hin góðgerðarsamtökin eru Refugees United, Læknar án landamæra í Sviss, Mænuskaðastofnun Íslands og Unicef á Íslandi.

Tónlistarmenn á Gogoyoko og útgáfufyrirtæki geta valið að láta tíu prósent eða meira af ágóðanum af tónlistarsölu renna til samtakanna, sem fá líka tíu prósent af auglýsingatekjum Gogoyoko árlega.