Í yfirlið þegar konan bar vitni

Fjörutíu og níu ára gamall tyrkneskur maður hné í ómegin í réttarsal í Lundúnum í dag þegar eiginkona hans vitnaði gegn honum vegna morðsins á dóttur þeirra.

Dóttirin sem var fimmtán ára varð ástfanginn af manni sem tilheyrði annarri grein múslimatrúarinnar en fjölskylda hennar.

Þar sem hún hafði haft mök við manninn litu karlmennirnir í fjölskyldunni svo á að hún væri verðlaus eign, þar sem hún væri ekki lengur jómfrú. Auk þess hefði hún með framferði sínu bakað fjölskyldunni óbærilega skömm.

Í ákæruskjali segir að vegna þessa hafi verið haldin fjölskylduráðstefna þar sem faðirinn og tveir frændur ákváðu að myrða bæði dótturina og elskhugann.

Dóttirin hvaf sporlaust en föðurnum mistókst að drepa elskhugann þegar hann réðst á hann með exi tveim vikum síðar.

Í vitnisburði sínum sagði móðirin að hún hefði verið mjög á móti sambandi dóttur sinnar við manninn.

Hún byrjaði að lýsa lífi þeirra í Bretlandi, en gera varð frest á réttarhöldunum þegar bóndinn hné niður. Fáheyrt er að múslimakonur beri vitni gegn eiginmönnum sínum.