Icesave fyrirvarar ná ekki til vaxta

Efnhagsfyrirvarar Íslands í Icesave samkomulaginu ná ekki til greiðslu vaxta sem eru um fjórðungur af árlegum afborgunum. Greiðslur vegna Icesave munu nema um 55 milljörðum króna á ári. Samningurinn mun draga úr lífsgæðum hér á landi segir fulltrúi Sjálfstæðisflokks í Fjárlaganefnd.

Skrifað verður undir Icesave samkomulagið nú í hádeginu en frumvarp þessa efnis verður dreift á Alþingi í dag.

Samkvæmt því samkomulagi sem nú liggur fyrir er gert ráð fyrir því að árlegar afborganir af höfuðstól lánsins miðist við hagvöxt en ársfjórðungslegar greiðslur hefjast í september 2016.

Alþingi setti þennan fyrirvara til að tryggja að greiðslubyrði lánsins yrði ekki þjóðinni ofviða.

Þessir fyrirvarar ná hins vegar ekki til greiðslu vaxta.

Miðað við núliggjandi áætlanir er gert ráð fyrir því að 90 prósent af eignum Landsbankans muni ganga upp í Icesave skuldina. Með vöxtum falla því um 300 til 350 milljarðar á Íslendinga vegna Icesave.

Íslendingar munu því greiða samkvæmt þessu um 50 milljarða króna á ári þar af um 15 milljarða í vexti til ársins 2024. Lánið framlengist sjálfkrafa til ársins 2030 ef það hefur ekki verið greitt upp að fullu fyrir þann tíma.

Íslendingar munu þó alltaf þurfa að greiða vexti óháð framvindu efnhagsmála.

Kristján Þór Júlíusson, fultrúi sjálfstæðisflokks í fjárlaganefnd, segir að íslendingar geti greitt þessar skuldir en ekki án fórna. Draga mun verulega úr lífsgæðum hér á landi.