Eitt atkvæði bjargaði Þórshöfn og Þistilfirði

Stjórn Sparisjóðs Þórshafnar og nágrennis hafði samþykkt að sameinast Sparisjóði Keflavíkur og bjóða síðan upp á girnileg kaup á stofnfjárbréfum sem áttu að skila hverjum og einum stórfelldum gróða.

Guðmundur Vilhjálmsson, sjómaður og stofnfjáreigandi, segir að búið hafi verið að útvega lánsfé frá Landsbankanum fyrir stofnfjáraukningunni. Menn hefðu í raun ekki þurft að gera neitt annað en að skrifa nafnið sitt.

"Hefðu menn gert það væri fjöldi manns hér á vonarvöl," segir Guðmundur í samtali við Stöð 2.

Stofnfjáreigendur hefðu skuldsett sig um 400 milljónir króna á þeim tíma og ef menn hefðu tekið þetta sem myntkörfulán væri skuldin komin í 800 milljónir króna, að sögn Guðna Haukssonar sparisjóðsstjóra, sem hann segir háa upphæð fyrir lítið samfélag.

Steingrímur J. Sigfússon og hans ættmenni á Gunnarsstöðum voru með Guðmundi í andófinu, - þeir vildu halda sparisjóðnum í höndum heimamanna, - og það var hart tekist á. Guðmundur segir að það hafi verið um 20 manna hópur sem stóð fastur á móti sameiningunni og þau hafi fengið ýmislegt á sig á þeim tíma.

Sameiningin féll á aðeins einu atkvæði. Aukinn meirihluta þurfti, eða 66,7%, til að samþykkja. Þegar atkvæðin voru talin reyndust 66% vera fylgjandi, - 34% á móti, - og það dugði til að fella tillöguna.

Reyndar var kosið aftur nokkrum mánuðum síðar og sameiningin þá samþykkt en þá var hrunið að byrja og hún gekk aldrei í gegn. Guðni Hauksson sparisjóðsstjóri var í hópi meirihlutans sem vildi sameiningu. Hann segir að eftir á að hyggja hafi gerst hlutir sem breyttu stöðunni algerlega og sem betur fer hafi þeir ekki verið komnir það langt í ferlinu að þeir gátu bakkað út.

Áætla má að þar með hafi um 80 fjölskyldum verið forðað frá því að tapa 800 milljónum króna. En hefur andstöðuhópnum verið þakkað fyrir?

"Það er einn búinn að koma til mín og þakka mér fyrir, og segja að það hafi verið eins gott að þetta gekk ekki í gegn," segir Guðmundur Vilhjálmsson.