Stoke hefur áhuga á Cisse

Bresk blöð greindu frá því í dag að franski framherjinn Djibril Cisse væri undir smásjá enska úrvalsdeildarliðsins Stoke City.

Cisse var á láni hjá Sunderland frá Marseille síðasta vetur en stóð sig ekki betur en svo að Sunderland hafði engan áhuga á að halda honum.

Frakkinn hefur einnig verið orðaður við Tottenham en sjálfur lýsti hann yfir áhuga á að spila fyrir félagið á dögunum.

Marseille virðist engan áhuga hafa á að nota Cisse og hefur lýst því yfir að hann megi fara frá félaginu. Eina vandamálið samt er að það er ekki beint slegist um að kaupa kappann.