Ramsay fékk óvæntan gest

Sjónvarpskokkurinn Gordon Ramsay lætur sér fátt fyrir brjósti brenna og hefur gefið af sér þá ímynd að ekkert komi honum úr jafnvægi. Nema kannski brjálaðir lundar á Íslandi og steikt hjörtu. Og hjákona á tökustað. Já, eins og kom fram í heimspressunni stóð hjónaband kokksins ansi tæpt þegar breskir fjölmiðlar greindu frá því að hann hefði átt í ástarsambandi við Söruh Symonds. Ramsey vísaði því á bug og sagðist aldrei hafa stigið í vænginn við neina konu nema frúna.

Symonds birtist hins vegar óvænt á tökustað þegar Ramsay var að segja lærlingum sínum á Hell‘s Kitchen, veitingastaðnum sínum í Los Angeles, til syndanna. Tökuvélarnar voru ekki lengi að finna Symonds og beindu kastljósinu að henni í stutta stund en svo hvarf hún eins og hendi væri veifað. Talið er að tökurnar hafi staðið yfir í janúar á þessu ári og telja fjölmiðlar nú nokkuð ljóst að kjaftfori kokkurinn og Sarah hafi jafnvel ruglað saman reitum á einhverjum tímapunkti.