Athvarf fyrir sextíu konur

Hjálparstarf Mæðrahús sem reist var að frumkvæði Íslendinga var formlega opnað í bænum Engela í Namibíu í vikunni. Forsetafrú Namibíu, frú Penehupifo Pohamba, opnaði húsið að viðstöddu fjölmenni, en hún var verndari söfnunar til byggingar hússins.

Saga hússins á rætur sínar að rekja til þess er Vilhjálmur Wiium, umdæmisstjóri Þróunarsamvinnustofnunar Íslands í Namibíu, ók fram á konur sem biðu fæðingar á spítalanum í Engela í Ohangwena-sýslu nyrst í Namibíu. Spítalinn er sá eini í sýslunni en í henni búa 230 þúsund manns og þangað koma mæður hvaðanæva að. Einkum sækjast konur sem óttast vandamál við fæðingu eftir að fæða á spítalanum. Ekkert pláss var hins vegar til þess að taka konurnar inn fyrr en hríðir hófust. Höfðust þungaðar konur því við undir tveimur trjám í nágrenni spítalans, elduðu sér mat á hlóðum og sváfu úti, oft í talsverðum kulda.

Við svo búið mátti ekki una og eftir umræður og bollaleggingar var hafist handa við að safna fé til húsbyggingar.

Margir lögðu hönd á plóginn við að reisa húsið, fyrirtæki og stofnanir á svæðinu til að mynda. Íslendingar lögðu til um þriðjung af heildarkostnaði, Reykjanesbær stóð fyrir fjáröflun á Ljósanótt árið 2007, en þar söfnuðust 300.000 krónur sem runnu í byggingu mæðrahússins. Þróunarsamvinnustofnun Íslands lagði einnig til fé.

Talsverðar tafir urðu á byggingu hússins, meðal annars vegna flóða. En það reis að lokum og er mikil ánægja með það í héraðinu samkvæmt upplýsingum Þróunarsamvinnustofnunar Íslands. Í húsinu eru átta gististofur sem geta hýsta sextíu konur samtímis. Þar er eldunaraðstaða sem konurnar geta nýtt sér og einnig er góð hreinlætisaðstaða með sturtum. Í húsinu er aðstaða til að veita mæðrum ráðgjöf um fæðingar og umönnun barna. sigridur@frettabladid.is