Athafnafólk veðjar á Laugaveginn

„Mig hefur lengi langað að opna barnaverslun og sérstaklega eftir að hafa hellt mér út í barneignir. Ég elska börn," svarar Ingibjörg Þovarldsdóttir athafnakona, oft kennd við Habitat, aðspurð um nýja barnafataverslun sem hún og eiginmaður hennar Jón Arnar opnuðu síðustu helgi með Bödda klippara á Laugavegi 25.

„Ég dundaði mér við að setja saman konsept í vetur og við Böddi höfum í mörg ár talað um að gera eitthvað saman. Planið var nú tískuvöruverslun. Svo sagði ég honum frá þessu fyrir tilviljun sem við Jón vorum að gæla við og hann vildi endilega vera með í leiknum."

„Böddi er barnakarl sjálfur og á einmitt 3 stelpur og ég 3 stráka en þeir heita allir Smári í seinna nafni, það er Natan Smári, Baltasar Smári og Þorvaldur Smári og ég skírði búðina fyrir löngu í höfðinu: „3 SMÁRAR"," segir Ingibjörg ánægð.

„Aldurinn er 0-12 ára og markmiðið er að það sé gaman fyrir alla að koma. Mikið er lagt uppúr að hafa búðina ævintýralega og öðruvísi. Okkur langaði að höfða til fullorðinna og barna á öllum aldri."

„Laugavegur varð fyrir valinu því okkur langaði það mest því stemningin er svo góð og yndisleg í miðbænum og þessi partur af Laugavegi í uppáhaldi hjá okkur."

„Svo er ríkt í manni að taka þátt í uppbyggingu á miðbænum því við höfum óbilandi trú á honum. Þar fyrir utan er þægilegt að komast að með kerrur og vagna."

„Við verðum líka með góða aðstöðu fyrir mömmur með lítil kríli og börn ásamt leiksvæði og þess háttar." 

„Sameinað búðarráp og heilsuganga er líka yndislegt. Það eru margar góðar ástæður fyrir Laugavegsvalinu," segir Ingibjörg að lokum.