Nálgunarbann staðfest í Hæstarétti

Hæstiréttur staðfesti í dag úrskurð Héraðsdóms Suðurlands þess efnis að manni skuli gert að sæta nálgunarbanni í þrjá mánuði. Manninum er meinað að koma nálægt heimili konu sinnar og þriggja barna þeirra. Jafnframt er honum bannað að veita konunni og börnunum eftirför, ónáða þau á almannafæri eða setja sig með öðru móti í samband við þau.

Lögregla hefur til rannsóknar tvö mál sem varða meinta áreitni mannsins á hendur fjölskyldunni. Auk þess kemur fram að konan hafi leitað liðsinnis lögreglu vegna ítrekaðra hótana og áreitis auk þess sem móðir mannsins hafði samband við lögreglu í kjölfar þess að hann hafði í samtali við hana viðhaft hótanir í garð konunnar.