Vikið verði frá stóriðjustefnu fyrri stjórna

Ung vinstri græn krefjast þess að ríkisstjórn Vinstri grænna og Samfylkingar beiti sér af fullum þunga fyrir því að horfið verði frá stóriðjustefnu fyrri ríkisstjórna tafarlaust. Að þeirra mati hefur sú stefna nú þegar valdið íslenskri náttúru miklum skaða sem og efnahag þjóðarinnar.

Ung vinstri græn fagna því að Kolbrún Halldórsdóttir, umhverfisráðherra, skuli beita sér gegn álveri á Bakka og skora á hana að gera slíkt hið sama varðandi álver í Helguvík.

„Ung vinstri græn telja áform um álver í Helguvík og á Bakka vera leifar af gjaldþrota stefnu Sjálfstæðisflokksins og blekkingarleik sem þarf afhjúpa strax. Það liggur fyrir að íslenskt orkufyrirtæki hafa ekki næga orku tiltæka til þess knýja þessi álver né heldur geta þau fjármagnað virkjun hennar. Þá er áliðnaður í mikilli niðursveiflu og heimsmarkaðverð á áli í frjálsu falli. Álframleiðendur hafa því neyðst til þess að draga úr framleiðslu, segja upp fólki, fresta fjárfestingum og jafnvel loka verksmiðjum," segir í ályktun ungliðahreyfingarinnar.

„Ungum vinstri grænum þykir það liggja ljóst fyrir að engar forsendur eru fyrir frekari álversuppbyggingu hér á landi á næstu árum. Nú þegar stefnir í mikið atvinnuleysi er það ábyrgðarhluti fyrir nýja ríkisstjórn að hverfa endanlega frá gjaldþrota stóriðjustefnu og leita raunhæfari og umhverfisvænni leiða í atvinnuuppbyggingu."