Ólafía Hrönn verður miðill

„Við byrjum tökur í júlí og ef allt gengur samkvæmt áætlun er ráðgert að þeim ljúki í ágúst,“ segir Grímur Hákonarson. Hann er að fara að leikstýra sinni fyrstu kvikmynd í fullri lengd eftir mikla velgengni á stuttmyndasviðinu. Nægir þar að nefna Slavek the Shit og Bræðrabyltu sem báðar hafa hlotið fjölmörg verðlaun á alþjóðlegum hátíðum. Það er kvikmyndafyrirtæki Baltasars Kormáks, Blue Eyes, sem framleiðir myndina en einvalalið tæknifólks kemur að gerð hennar: Ari Kristinsson verður á bak við tökuvélina og Linda Stefánsdóttir sér um leikmyndahönnunina.

Sumarlandið er kolsvört kómedía með þeim Ólafíu Hrönn Jónsdóttur og Kjartani Guðjónssyni í aðalhlutverkum; Ólafía leikur miðil af gamla skólanum en Kjartan er eiginmaður hennar. „Persóna Ólafíu er byggð á þekktum miðlum á borð við Erlu Stefánsdóttur og Þórunni Maggý. Hún er ekki með nein spil eða spákúlu heldur er bara í góðu sambandi við hina framliðnu, er hálfgerður sálusorgari fyrir syrgjendur,“ segir Grímur.

Persóna Kjartans er hins vegar illa smituð af 2007-hugsunarhættinum þar sem allt var til sölu, álfar, tröll og bara spíritisminn eins og hann leggur sig. „Hann reynir að markaðssetja þetta allt af miklum móð.“ Upphaflega stóð til að myndin færi í tökur síðasta haust en ekki náðist að fjármagna myndina að fullu. Grímur kveðst hálffeginn yfir þeirri lendingu. „Ég nýtti veturinn til að fara aðeins betur yfir handritið og fékk Ólaf Egil Egilsson til að fara aðeins yfir það með mér.“

Leikstjórinn segist tilbúinn fyrir kvikmynd í fullri lengd, þetta sé eitthvað sem hann hafi alltaf stefnt að. „Annars finnst mér lítill munur á stuttmyndum og kvikmyndum í fullri lengd, þetta er bara aðeins meiri vinna, lengri tökutími en annars voðalega svipað,“ segir Grímur sem gerir sér þó fyllilega grein fyrir því að svona kvikmyndagerð fylgir meiri pressa. „Sem betur fer er Sumarlandið tiltölulega einföld mynd, hún gerist mestmegnis á sama staðnum. Hún er enginn Myrkrahöfðingi, slík mynd kemur bara seinna.“

freyrgigja@frettabladid.is