Gísli Marteinn: Gef alltaf upp til skatts þegar ég fæ borgað

Gísli Marteinn Baldursson borgarfulltrúi Sjálfstæðisflokksins sem fór í laxveiðiferð á vegum Glitnis til Rússlands segir að hlutverk sitt í ferðinni hafi verið að annast veislustjórn. DV vekur athygli á málinu í dag en ferðin var farin sumarið 2007. Aðspurður hvort hann hafi fengið greitt fyrir viðvikið segist Gísli ekki vera með það á hreinu en að hann telji þó að svo hafi ekki verið.

„Alltaf þegar ég fæ borgað fyrir svona uppákomur gef ég það upp til skatts. Í þessu tifelli held ég að ferðin sjálf og uppihaldið hafi verið það sem ég fékk fyrir viðvikið. Það hefur verið almenna reglan í þessu þegar veislustjórar eru að fara á atburði erlendis eins og á árshátíðir íslendingafélaga til dæmis," segir Gísli. Aðspurður hvort hann þurfi að greiða hlunnindaskatt af slíku fyrirkomulagi segist Gísli ekki hafa álitið að slíkt eigi við í tilvikum sem þessum.

Gísli segist hafa verið veislustjóri oftar en hann geti komið tölu á í gegnum árin. Þegar hann er spurður hvort það sé við hæfi að stjórnmálamenn standi í slíku, segist Gísli alveg vera til í að taka þá umræðu.

„Ég hef hins vegar aldrei séð neinn hagsmunaárekstur í því, þvert á móti. Mér finnst þetta mjög skemmtilegt og alveg síðan ég var í sjónvarpinu hef ég töluvert oft verið beðinn um að gera þetta. Ég er fenginn í þetta til þess að halda uppi góðri stemmningu og ef ég tel mig geta gert það sómasamlega er ég til í það," segir Gísli Marteinn að lokum.