Átta Pólverjar fyrir rétti vegna þjófnaða

Nokkur viðbúnaður var í Héraðsdómi Reykjaness í gær vegna fjölda sakborninga sem þá mættu fyrir rétt í umfangsmiklu þjófnaðarmáli. Þar eru átta manns af pólskum uppruna, um og yfir tvítugu, sökuð um aðild að fjölda þjófnaðarmála víðs vegar á höfuðborgarsvæðinu á þessu ári.

Auk gæslumanna frá fangelsinu á Litla-Hrauni gættu lögreglumenn af höfuðborgarsvæðinu þess að allt færi vel fram. Aðalmeðferð í málinu hófst í gær og lýkur síðdegis í dag.

Auk sakargifta sem snúa að þjófnuðum er sambýliskona eins mannsins jafnframt sökuð um að hafa reynt að hylma yfir með honum og að hafa reynt að aðstoða við að koma stolnum munum í verð.

Handtökur fóru fram snemma í ágúst, en þrír úr hópnum hafa setið í gæsluvarðhaldi síðan þá, tveir á Litla-Hrauni og einn í hegningarhúsinu við Skólavörðustíg í Reykjavík. Stúlkan var handtekin fyrir utan verslunina Gull og Silfur eftir að hafa reynt að selja þar stolna skartgripi.

Létt var yfir sakborningum áður en réttarhöldin hófust í gærmorgun og heilsuðust glaðlega þeir sem mættir voru og hinir sem komið var með úr gæsluvarðhaldi.

Játning liggur fyrir í hluta sakargifta, en í öðrum neita sakborningar sök eða játa að hluta. Málin eru fjölmörg, en þau varða meðal annars innbrot í íbúðir og bíla, auk annarra þjófnaðarmála.

Unnustan sem sökuð er um hylmingu neitaði sök fyrir rétti í gær og kvaðst ekki hafa gert sér grein fyrir því að um þýfi hafi verið að ræða. Unnusti hennar kvaðst hafa keypt stolnu munina af manni við vídeóleigu í Breiðholti og kvaðst hafa talið þá hluta af braski tengdu pólskri vefsíðu að nafni Forum þar sem hlutir gangi kaupum og sölu.

Andvirði stolinna muna í einum ákæruliðanna er metið á 1,5 milljónir króna og kemur úr einu innbroti. - óká