Jackson með fernu

Popparinn sálugi Michael Jackson vann fern verðlaun á Bandarísku tónlistarverðlaununum sem voru haldin hátíðleg í Los Angeles. Með verðlaununum skráði Jackson nafn sitt í sögubækur hátíðarinnar því hann hefur þá unnið 23 verðlaun, fleiri en nokkur annar. Hann fékk meðal annars verðlaun í flokknum besti popp- og rokktónlistarmaðurinn og sem besti sálar- og R&B-tónlistarmaðurinn. Það var Jermaine Jackson sem tók á móti verðlaununum fyrir hönd bróður síns.

Sveitasöngvarinn Taylor Swift var annars sigurvegari kvöldsins með fimm verðlaun, þar á meðal sem tónlistarmaður ársins. Jennifer Lopez var ekki eins heppin því hún datt á rassinn í dansatriði þar sem hún söng sitt nýjasta lag. Hún lét það ekki á sig fá og hélt ótrauð áfram.