Segir Björk greiða 99% af tekjum sínum í ríkissjóð

Björk Guðmundsdóttir söngkona mun leggja sitt af mörkum við að vinna Ísland út úr kreppunni. Henni veitir heldur ekkert af því, enda er hún nánast eini Íslendingurinn sem þénar eitthvað nú um mundir.

Þetta segir í það minnsta fréttavefurinn Spoof. Fréttavefurinn, sem er ekki þekktur fyrir að láta sannleikann eyðileggja fyrir sér góðar fréttir, segir að Björk greiði 98% af tekjum sínum í skatta. Þá segir vefurinn að Björk og sjávarútvegurinn skapi sameiginlega alla verga þjóðarframleiðslu á Íslandi um þessar mundir.

Þá segir vefurinn að Björk hafi lagt til að þorskur yrði tekinn upp sem gjaldmiðill á Íslandi. Íslendingar eigi nóg af honum, eftirspurn sé eftir honum í öðrum ríkjum og í versta falli sé hægt að éta hann. Þá sé um endurnýjanlega auðlind að ræða. Spoof segir að tillaga Bjarkar hafi verið samþykkt en sá galli sé á gjöf Njarðar að það þyrfti að breyta öllum hraðbönkum við gjaldmiðilsbreytinguna.