Elvis-lokkar á uppboði

Harðir Presley-aðdáendur hyggja sér nú gott til glóðarinnar þar sem nokkrir hárlokkar af höfði rokkgoðsins verða boðnir upp hjá Leslie Hindman í Chicago í næstu viku. Spámenn giska á að hver lokkur fari á um það bil átta til tólf þúsund dollara en um er að ræða afrakstur hinnar frægu klippingar sem Presley lét sig hafa áður en hann gekk í herinn árið 1958. Uppbjóðandinn hefur til öryggis látið framkvæma DNA-rannsókn á hárinu sem hann hyggst bjóða upp og getur því lagt fram opinber gögn til stuðnings því að lokkarnir séu í raun af höfði hins forna rokkgoðs.