Norður-Kóreumenn skjóta á ný

Norður-Kóreumenn virðast eiga í nokkrum erfiðleikum með að ákveða hvort þeir ætla að standa við gefin orð eður ei. Í gær skutu þeir óvænt á loft fimm skammdrægum eldflaugum og samkvæmt suðurkóresku Yonhap-fréttastofunni er von á að minnsta kosti einu eldflaugaskoti til viðbótar í dag. Til sannindamerkis um þetta hafa Norður-Kóreumenn varað sjófarendur við að vera á ferð á vissum svæðum út af vesturströnd landsins. Stjórnmálaskýrendur telja þessar aðgerðir skjóta skökku við aðeins örfáum dögum eftir að Norður-Kóreumenn hétu því, ljúfir sem lömb, að hætta öllu vopnabrölti og snúa aftur til sexríkjaviðræðnanna svokölluðu þar sem afvopnunarmál eru til umræðu.