Hagræðing ástæða fyrir starfslokum Sigurðar

„Þetta er bara hluti af breytingum á stöðinni. Við erum að velta öllum steinum hjá okkur og það hefur staðið til að skoða fyrirkomulagið á veðurmálunum eins og fleiru," segir Ari Edwald, forstjóri 365 miðla, um brotthvarf Sigurðar Ragnarssonar veðurfréttamanns á 365.

Ari segir ástæðuna vera hagræðingu og hafnar því alfarið að ástæða fyrir uppsögninni sé sú að fyrirtæki í eigu Sigurðar hafi unnið fyrir Skjá einn. „En það hafði kannski áhrif á tímasetninguna að við vorum að fara yfir þessi mál," segir Ari. Hann segir fulla sátt vera á milli sín og Sigurðar um niðurstöðuna. „Og það hvernig við bindum enda á okkar samstarf er í fullri sátt okkar á milli," segir Ari.

Sigurður hefur verið ráðinn í morgunútvarp Kanans, en þar mun hann sjá um veðurfréttir tvisvar í viku.