Bæjarstjórinn í Grindavík: Óróleikinn auðvitað slæmur

„Óróleikinn er auðvitað afar slæmur og það er ekki síst íbúanna og byggðarinnar vegna," segir Jóna Kristín Þorvaldsdóttir, bæjarstjóri í Grindavík, um stöðu mála í bæjarfélaginu en mikill óróleiki hefur verið í bæjarpólitíkinni í Grindavík undanfarið ár.

Síðasta sumar slitnaði upp úr meirihlutasamstarfi Sjálfstæðisflokks og Samfylkingar vegna málefnaágreinings og í framhaldinu myndaði Samfylkingin nýjan meirihluta með Framsóknarflokknum. Í vor hrikti í stoðum meirihlutasamstarfsins þegar tekist var á um mannaráðningar í bæjarfélaginu og fyrir skömmu gengu bæjarfulltrúi Frjálslynda flokksins og annar af tveimur bæjarfulltrúum Samfylkingarinnar í Vinstrihreyfinguna grænt framboð. Þar með var „meirihlutinn" ekki lengur með meirihluta í bæjarstjórninni.

Fyrir helgi undirrituðu bæjarfulltrúar Vinstri grænna, Samfylkingar og Framsóknarflokks samkomulag sem felur í sér að fulltrúar Vinstri grænna verja minnihlutastjórn Samfylkingar og Framsóknar með hlutleysi sínu út kjörtímabilið.

„Ég ætla svo sannarlega að vona að svo verði," segir Jóna Kristín aðspurð hvort að meirihlutinn muni starfa út kjörtímabilið. Mörg brýn mál bíði úrlausnar.

„Það er líf og kraftur í bæjarfélaginu og atvinnulífið snýst á fullri ferð," segir bæjarstjórinn sem er bjartsýnn á framtíð bæjarfélagsins. „Í Grindavík er gott og fjölskylduvænt samfélag," segir Jóna Kristín.