Hirti nokkrar þvottavélar og þurrkara

„Ég hirti nokkrar þvottavélar og þurrkara handa heimilisfólkinu mínu og gaf nokkrum íþróttafélögum nokkur eintök,“ segir Tómas J. Knútsson, sem tók að sér að farga um 300 heimilistækjum af varnarsvæðinu á Keflavíkurflugvelli.

Ofangreind ummæli Tómasar eru úr tölvuskeyti hans til rafmagnsöryggissviðs Brunamálastofnunar. Tómas sendi skeytið einnig til Fréttablaðsins sem á föstudag sagði frá því að Rafiðnaðarsamband Íslands teldi að heimilistæki sem áður tilheyrðu her Bandaríkjanna væru seld eða gefin út af vallarsvæðinu í trássi við lög sem banna notkun þeirra hérlendis.

Í skeyti Tómasar kemur fram að tækin sem hann átti að koma í lóg hafi verið í íbúðum þar sem rekstraraðilar á Ásbrú hafi verið búnir að breyta rafmagnsspennu úr ameríska 110 volta kerfinu yfir í 220 volta kerfið íslenska. „Ég hef bent öllum aðilum á það að kaupa réttu straumbreytana hjá réttum aðilum,“ útskýrir Tómas.

Rafiðnaðarsambandið segir að notkun tækjanna ofan af Keflavíkurflugvelli í „íslensku rafumhverfi“ geti verið lífshættuleg og hefur vísað málinu til rafmagnsöryggissviðs Brunamálastofnunar. Jóhann Ólafsson sviðsstjóri sagði í Fréttablaðinu á föstudag að þótt tækin væru ólögleg væru þau ekki lífshættuleg. - gar