Geislandi fegurð á ströndinni

Ungfrú Ísland verður krýnd á Broadway annað kvöld en keppendurnir brugðu á leik í sólinni í Nauthólsvík í gær - ólíkt föngulegri hópur en þeir sem stundum sjást þar leggja stund á sjóböð.

„Já, stóra stundin að renna upp. Rosaspenna og stress á sama tíma og þetta er ógeðslega gaman," segir Sylvía Dagmar Friðjónsdóttir - ein keppenda í Ungfrú Ísland keppninni.

Ungfrú Ísland verður krýnd á Broadway á morgun og verður öllu til tjaldað. Sigurvegarinn mun í framhaldinu keppa í Miss World, Alexandra Helga Ívarsdóttir krýnir arftaka sinn, en hún keppti einmitt í Miss World í Suður-Afríku árið 2008 og var kjörin sportstúlka þeirrar keppni. Kynnir keppninnar verður Unnur Birna Vilhjálmsdóttir, Miss World árið 2005.

Sýnt verður frá keppninni í beinni útsendingu á Skjá einum en í dómnefnd sitja sérstakir áhugamenn um kvenlega fegurð: Arnar Laufdal formaður, Guðrún Möller, framkvæmdastjóri Snyrtiakademíunnar, Elísabet Jónsdóttir skrifstofu- og markaðsstjóri Forvals, Valgeir Magnússon, framkvæmdastjóri Pipars, Hafdís Jónsdóttir, framkvæmdastjóri World Class, Heiðar Jónsson snyrtir og Karl Berndsen, förðunarfræðingur og dagskrárgerðarmaður.

Að baki eru stífar æfingar sem hafa staðið í þrjár vikur. Ekki gaman að vera inni við æfingar í Broadway þegar brjáluð blíða er og því brá hópurinn á það ráð að skreppa í Nauthólsvík.

„Við ákváðum að skella okkur í sólina," segir Sylvía sem lenti í 2. sæti í keppninni um Ungfrú Reykjavík. Segir að sú reynsla komi sér vel núna því hún sé ekki eins stressuð nú og þá. „Það sem stressar helst er að koma fram og að eitthvað klúður verði. Að maður detti eða eitthvað svoleiðis. Það hefur nefnilega komið fyrir," segir Sylvía. Hún stundar nám við Menntaskólann í Kópavogi og spilar handbolta með meistaraflokki HK. Og stefnir á nám í fjölmiðlafræði í framtíðinni. Sylvía segir litla samkeppni innan hópsins, stelpurnar hafi smollið fáránlega vel saman og séu nú miklar vinkonur þótt þær hafi ekki þekkst áður.

Fegurðarsamkeppnir hafa á stundum sætt mikilli gagnrýni meðal femínista en Sylvía segir þær ekki hafa orðið varar við það, það sé þá eitthvað tal í bakið á þeim því allir sem hún tali við um keppnina séu mjög jákvæðir.