Loftgæði bætt í höfuðborginni

Stefnt er að því að draga úr losun gróðurhúsalofttegunda í Reykjavík um 35 prósent til ársins 2020 og um 73 prósent til ársins 2050, samkvæmt loftslags- og loftgæðastefnu Reykjavíkurborgar.

Reykjavíkurborg er fyrsta sveitarfélagið á Íslandi sem setur sér stefnu af þessu tagi, að því er segir á vef borgarinnar. Stýrihópur hefur undanfarið unnið að undirbúningi stefnunnar og meðal annars lagt fram fjölda tillagna um hvernig innleiða megi stefnuna.

Nú losar hver íbúi í Reykjavík um þrjú tonn af koldíoxíði á ári. Nái markmið stefnunnar fram að ganga verður losun á hvern íbúa um 1,7 tonn af koldíoxíði árið 2020 og um 0,6 tonn árið 2050. - kh