Þannig fara hjónabönd í hundana

Þegar eiginkonan sagði manninum að hún ætlaði út að ganga með hundinn og hitta vinkonur sínar til þess að fá sér kaffisopa, ákvað maðurinn að fara í gönguferð með börnin. Það er enda hlýtt og fallegt á Sikiley á þessum árstíma.

Eftir góðan göngutúr voru eiginmaðurinn og börnin á heimleið þegar þau allt í einu heyrðu glaðlegt gelt og ýlfur. Og jú, hinummegin við götuna, fyrir framan litla krá stóð Yokshire Terrier hundurinn þeirra bundinn.

Hann dillaði ákaft litla skottinu og hélt áfram að gelta og ýlfra. Fjölskyldan fór náttúrlega yfir götuna til þess að klappa honum og eiginmaðurinn kíkti á gluggann eftir eiginkonu sinni og vinkonum hennar.

Konuna sá hann en engar vinkonur. Hinsvegar sá hann mjög vel kráareigandann sem konan var í heitum faðmlögum við.

Kráareigandinn var fluttur á sjúkrahús þar sem gert var að sárum hans sem voru sem betur fer ekki alvarleg.

Og hjónin? Tja, spyrjið þið hundinn.