Áherslur Samfylkingarinnar í viðræðunum við VG

Breytingar á stjórn Seðlabankans, bjargráðasjóður fyrir heimilin, sem meðal annars er fjármagnaður af auðmönnum, og kosningar 30. maí er meðal þess sem Samfylkingin leggur áherslu á í stjórnarmyndunarviðræðum við Vinstri Græna.

Heimildir fréttastofu herma að Samfylkingin leggi áherslu á eftirfarandi atriði í stjórnarmyndunarviðræðunum:

Að efnahagsáætlun Alþjóðagjaldeyrissjóðsins verði fylgt eftir með framkvæmdanefnd sem yrði undir forystu formanna flokkanna.

Komið yrði á fót upplýsingamiðstöð svo að miðlun upplýsinga til almennings verði betri en hún er nú.

Þá eru einnig lagðar til breytingar á stjórnarskrá varðandi fullveldi og auðlindir.

Ofarlega á blaði er sú krafa Samfylkingarinnar að skipta um yfirstjórn í Seðlabanka Íslands. Bankastjórar Seðlabankans eru nú þrír en lagt er til að aðeins verði einn bankastjóri og verði hann ráðinn út frá alþjóðlegum hæfniskröfum.

Þá vill Samfylkingin koma á fót peningastefnuráði sem mun taka ákvarðanir um beitingu stjórntækja bankans.

Samfylkingin vill líka sett verði lög sem tryggi að veðskuldir verði niðurfelldar og aðlagaðar að greiðslugetu óháð veðstöðu láns.

Milda á gjaldþrotameðferð og tryggja búsetuöryggi þeirra fjölskyldna sem missa heimili sín við gjaldþrot.

Þá leggur Samfylkingin til að stofnaður verði bjargráðasjóður heimilanna sem verði m.a. notaður til að lækka greiðslubyrði almennings. Sjóðurinn verður m.a. fjármagnaður með viðlagagjaldi sem leggst á hátekjufólk auk þess sem gert er ráð fyrir að auðmenn sem báru ábyrgð á hruni bankakerfisins leggi einnig hönd á plóg.

Tryggja á gott samstarf við aðila vinnumarkaðarins, fjölga störfum og bæta námslánakerfið. Auk þess sem þjónusta við skuldsett fyrirtæki verður tryggð.

Samfylkingin vill að gengið verði til kosninga 30. Maí og að samhliða verði þjóðaratkvæðagreiðsla um aðild að ESB. Samkvæmt heimildum fréttstofu vilja Vinstri grænir að kosningum verði flýtt eins og hægt er og stinga upp á því að efnt verði til þeirra 4. eða 18. apríl, enda eru liðsmenn flokksins á því að engin ástæða sé til að gefa Sjáflstæðisflokknum of langan tíma til að endurnýja forystu sína. Áður hefur Sjálfstæðisflokkur lagt til að kosið verði 9. maí.