Sjálfstæðisflokkurinn sparar fjörtíu milljónir

Sjálfstæðisflokkurinn sparar sér fjörtíu milljónir með því að reikna ekki vexti og verðbætur ofan á endurgreiðslur á risastyrkjum sem flokkurinn þáði af FL Group og Landsbankanum.

 

Sjálfstæðisflokkurinn byrjaði í gær að borga til baka 55 milljónir króna sem flokkurinn fékk korteri áður en lög um styrki til stjórnmálaflokka voru samþykkt í árslok 2006.

 

Flokkurinn ætlar að greiða styrkina til baka með jöfnum greiðslum á hverju ári næstu 7 árin, án vaxta- og verðbóta.

 

Það þýðir að flokkurinn þarf að meðaltali að greiða tæpar sjö milljónir á ári næstu sjö árin.

 

En það er athyglisvert að Sjálfstæðisflokkurinn ætlar hvorki að greiða vexti né verðbætur af styrkjunum sem hann hyggst endurgreiða. Það er lúxus sem meðaljón getur að öllu jöfnu ekki leyft sér.

 

Ef við prófum að reikna út endurgreiðslurnar með vöxtum og verðbótum myndi dæmið líta aðeins öðruvísi út.

 

Gerum ráð fyrir 8 prósent verðbólgu næstu sjö árin og setjum á þetta 6 prósent vexti. Afborganirnar yrðu þá frá tíu og hálfri milljón upp í tæpar sautján. Heildarendurgreiðslur myndu nema 95 milljónum króna. Eða 40 milljónum meira en flokkurinn ætlar að borga til baka.