Klippt af hundrað ökutækjum um helgina

Lögreglan klippti númeraplöturnar af tæplega eitt hundrað ökutækjum á höfuðborgarsvæðinu um helgina. Í tilkynningu frá lögreglu segir að töluvert sé um ótryggð og óskoðuð ökutæki á höfuðborgarsvæðinu eru eigendur hvattir til að gera þar bragarbót á.

„Undanfarið hafa skráningarnúmer verið fjarlægð af mörgum ökutækjum sem uppfylltu ekki ákvæði um skoðun eða voru ótryggð. Lögreglan heldur eftirlitinu áfram og hvetur ökumenn til að passa upp á þetta svo ekki þurfi að koma til fyrrnefndra aðgerða," segir ennfremur.

„Um helgina voru skráningarnúmer fjarlægð af tæplega hundrað ökutækjum sem voru ýmist ótryggð eða óskoðuð, og jafnvel hvorutveggja, en trassaskapur sumra í þessum efnum er með ólíkindum," segir að lokum.