Helmingur borgarfulltrúa birtir ekki fjárhagslegar upplýsingar

Átta borgarfulltrúar af fimmtán hafa enn ekki skilað upplýsingum um sína fjárhagslegu hagsmuni - eins og borgarráð samþykkti að gera fyrir mánuði. Þeirra á meðal er Hanna Birna Kristjánsdóttir borgarstjóri.

Borgarráð samþykkti í lok október að skrá fjárhagslega hagsmuni kjörinna borgarfulltrúa og birta opinberlega. Sjö hafa skilað og voru birtir á lista á heimasíðu borgarinnar nú í morgun - raunar hvarf listinn skömmu síðar, að sögn vegna tæknilegra örðugleika. Þeir sem hafa skilað eru Vilhjálmur Þ. Vilhjálmsson, Júlíus Vífill Ingvarsson og Gísli Marteinn Baldursson úr Sjálfstæðisflokki, Dagur B. Eggertsson, Björk Vilhelmsdóttir og Oddný Sturludóttir Samfylkingu og Sóley Tómasdóttir Vinstri grænum.

Meðal þeirra átta sem eiga eftir að skila eru borgarstjórinn og Ólafur F. Magnússon frjálslyndum en Ólafur hefur síðustu mánuði oft vakið máls á meintum hagsmunatengslum Hönnu Birnu borgarstjóra og Samson - eða Landsbankans. Nú síðast í gær sakaði hann hana um pólitíska spillingu og krafðist afsagnar hennar eftir að fréttir birtust í DV um að Hanna Birna hafi þegið styrk frá Landsbankanum fyrir prófkjörsbaráttuna 2005 - rétt eins og þrír aðrir borgarfulltrúar Sjálfstæðisflokksins. Heimildir DV hermdu að þessir styrkir hefðu verið allt að 800 þúsund krónur.

Í ljósi þessa telur Ólafur að Hanna Birna hafi verið gersamlega vanhæf til að beita sér fyrir byggingu Listaháskóla Íslands við Laugaveg - þar sem eigendur Landsbankans hugðust byggja yfir skólann. Ekki náðist í Hönnu Birnu í morgun - en hún hefur hingað til ekki svarað því hvort hún þáði framlag frá Landsbankanum á sínum tíma. En þess gæti verið skammt að bíða að allar slíkar upplýsingar liggi fyrir, því flokkar og frambjóðendur bæði til alþingis og sveitarstjórna hafa aðeins frest til 10. desember til að skila inn upplýsingum til Ríkisendurskoðunar um framlög yfir 200 þúsund krónum aftur til ársins 2002 - og þær upplýsingar verða síðan birtar opinberlega.