Þingflokkurinn vill Jóhönnu á formannsstól

Ríkur vilji er innan þingflokks Samfylkingar að Jóhanna Sigurðardóttir, forsætisráðherra, taki við formannsembættinu og leiði flokkinn í næstu kosningum.

Ingibjörg Sólrún Gísladóttir, formaður Samfylkingarinnar, tilkynnti í gær að hún ætlar ekki að bjóða sig fram til formanns á landsfundi flokksins í lok mánaðarins. Þá hyggst hún draga sig í hlé frá stjórnmálum vegna veikinda.

Nokkrir hafa verið nefndir sem mögulegir arftakar Ingibjargar. Þar á meðal Lúðvík Geirsson, bæjarstjóri Hafnarfjarðar, og Dagur B. Eggertsson, oddviti samfylkingarinnar í Reykjavík.

Össur Skarphéðinsson og Jóhanna Sigurðardóttir sögðu á blaðamannfundi í gær að þau myndu ekki sækjast eftir formannsembættinu.

Samkvæmt heimildum fréttastofu vill hins vegar meirihluti þingflokks Samfylkingarinnar að Jóhanna leiði flokkinn í komandi kosningum. Kemur þá meðal annars til greina að hún láti af embætti á miðju næsta kjörtímabili til að hleypa nýjum mönnum að.

Jóhann hefur nokkrar vikur til að skipta um skoðun en Landsfundur Samfylkingarinnar verðu haldinn helgina 27. til 29. mars næstkomandi. Tveir bjóða sig fram til varaformanns, þeir Árni Páll Árnason og Dagur B. Eggertsson.