Innlent

Segja lærin hvergi flottari en í Norður-Þingeyjarsýslu

Konur í Norður-Þingeyjarsýslu segja að hvergi finnist flottari læri en þar. Svo stoltir eru Norður-Þingeyingar af lambakjötinu sínu að þeir neita að selja það ódýrt.

Í Norður-Þingeyjarsýslum er sauðfjárrækt ein mikilvægasta atvinnugreinin og þar eiga bændurnir fyrirtækið Fjallalamb, sem er langstærsti atvinnurekandinn á Kópaskeri. Þarna starfa 12 til 15 manns í kjötvinnslu allt árið en í sláturtíðinni fer allt á hvolf og þar eru þessa dagana milli 60 og 70 manns í vinnu, þar af helmingurinn útlendingar. Heimafólkið er stolt af afurðunum.

Matsmennirnir Fjóla Runólfsdóttir, frá Gunnarsstöðum í Þistilfirði, og Guðrún Hvönn Sveinsdóttir, frá Hvannstóði í Borgarfirði eystra, segja báðar að lærin þarna séu ekkert venjuleg. Þær hafi aldrei séð önnur eins læri. Bændur hafi metnað fyrir ræktuninni og ekki sé alltaf auðvelt að vera matsmaður á Kópaskeri því þarna viti bændur í hvaða flokka lömbin sín eigi að fara. Um þrjátíu þúsund skrokkar renna þarna í gegn í haust. Dilkarnir eru vænir, meðalþungi rétt um 16 kíló.

Það er einmitt héðan sem hið fræga Hólsfjallahangikjöt kemur en Fjallalamb hefur verið í fararbroddi að upprunamerkja vörurnar og tengja þannig neytendur beint við bændur. Þarna vilja menn ekki selja lambakjötið ódýrt. Björn Víkingur Björnsson, framkvæmdastjóri Fjallalambs, segist telja að þeir séu með sérstöðu á markaði og dýra og góða vöru.

Um fimmtán prósent lambakjötsins er selt út til Noregs og Svíþjóðar fyrir verð sem þeir telja búandi við. Björn Víkingur segir að gengið og staða krónunnar hafi breytt öllu fyrir útflutninginn.



Mest lesið


Fleiri fréttir

Sjá meira


×

Mest lesið