Yfirlýsing frá Félagi heyrnalausra

Félag heyrnarlausra hafa sent frá sér tilkynningu þar sem þeir árétta að það sé mikilvægt að málefni Heyrnaleysingjaskólans hafi verið til lykta leidd.

Félagið lýsir ennfremur yfir ánægju með skýrslu nefndarinnar um vist- og meðferðarheimili þar sem meðal annars var fjallað um Heyrnaleysingjaskólann.

Þá hvetur Félag heyrnarlausra stjórnvöld til að standa vörð um réttindi og þátttöku heyrnarlausra í íslensku samfélagi.

Hér fyrir neðan má lesa yfirlýsingu félagsins í heild:

Félag heyrnarlausra lýsir yfir ánægju með skýrslu nefndar um vist- og meðferðarheimili þar sem m.a. er fjallað um starfsemi Heyrnleysingjaskólans á árunum 1947 - 1992. Ber sérstaklega að þakka fyrir greinargóða skýrslu þar sem dregin er upp heildstæð mynd af sögu heyrnarlausra nemenda í tæpa fimm áratugi.

Að mati Félags heyrnarlausra er það afar mikilvægt fyrir samfélag heyrnarlausra að fram sé komin niðurstaða opinberrar rannsóknar á dvöl heyrnarlausra barna í Heyrnleysingjaskólanum. Áður höfðu fulltrúar félagsins vakið athygli stjórnvalda á frásögnum fyrrum nemenda við skólann og óskað eftir aðgerðum stjórnvalda til að upplýsa um málið. Þrátt fyrir þungbæra reynslu fyrrum nemenda við skólann er það ákveðin léttir að fram er komin opinber staðfesting á frásögnum þeirra, frásögnum sem um hefur ríkt þögn.

Eins og fram kemur í skýrslunni er það afstaða nefndarinnar að sú kennslustefna sem tekið var mið af við kennslu í skólanum og sá aðskilnaður sem ung heyrnarlaus börn þurftu að upplifa hafi verið þessum hópi afar þungbær. Telur nefndin það engum vafa undirorpið að þessi aðstaða hafi átt verulegan þátt í að skerða lífsgæði heyrnarlausra einstaklinga í íslensku samfélagi.

Félag heyrnarlausra hvetur stjórnvöld til að fara að tillögum nefndar um vist- og meðferðarheimili þess efnis að tekin verði skýr efnisleg afstaða til framkominna tillagna um úrbætur í málefnum heyrnarlausra sem raktar eru í skýrslunni. Þá hvetur Félag heyrnarlausra stjórnvöld til að standa vörð um réttindi og þátttöku heyrnarlausra í íslensku samfélagi.