Mál e-töflusmyglara til ríkissaksóknara

Héraðsdómur Reykjaness hefur framlengt gæsluvarðhaldsúrskurð yfir tveimur pólskum karlmönnum sem voru handteknir um miðjan síðasta mánuð með tæplega 6000 e-töflur. Mál þeirra er komið til ríkissaksóknara sem tekur ákvörðun um það hvort að gefin verði út ákæra.

Mennirnir sem eru á þrítugsaldri voru handteknir á Keflavíkurflugvelli þegar þeir komu með flugi frá Varsjá aðfaranótt 12. september. Annar var með 2.647 töflur faldar í niðursuðudós og hinn 3.348 töflur sem einnig voru faldar í niðursuðudós. Lögreglan telur víst að töflurnar hafi verið ætlaðar til sölu og dreifingar hér á landi.

Mennirnir hafa setið í gæsluvarðhaldi frá því að þeir komu til Íslands. Vegna rannsóknarhagsmuna voru þeir jafnframt um tíma í einangrun.