Rossdale var hommi

Breska poppstjarnan Marilyn hefur ákveðið að svipta hulunni af fimm ára ástarsambandi sem hann og Gavin Rossdale áttu fyrir allmörgum árum. Eins og flestum ætti að vera kunnugt um er Rossdale nú eiginmaður No Doubt-söngkonunnar Gwen Stefani. Orðrómur um náin kynni Marilyns og Rossdales hefur verið á kreiki síðan Boy George nefndi það fyrst í ævisögu sinni Take it Like a Man. Rossdale vísaði því alfarið á bug þá og Marilyn sömuleiðis, þeir sögðust báðir hafa bara verið bestu vinir.

En nú hefur Marilyn sem sagt breytt framburði sínum og segir söngvara Bush hafa verið stóru ástina í lífi sínu. „Við vorum saman í fimm ár en mér leið eins og það hefðu verið fjörutíu,“ segir Marilyn. „Honum gekk mjög vel og ég ákvað að ljúga þrátt fyrir að hver taug í líkama mínum segði mér að það væri ekki það rétta í stöðunni.“