Hélt að hætt hefði verið við framsóknarboð Óskars

Svandís Svavarsdóttir oddviti Vinstri grænna í borgarstjórn segist hafa gert athugasemdir í forsætisnefnd við fyrirhugaða móttöku Óskars Bergssonar fyrir sveitastjórnarfulltrúa framsóknarflokksins. Hún lét hinsvegar ekki bóka neitt um málið og hélt að af móttökunni yrði ekki. Aðspurð um svipaða móttöku sem hennar flokkur hélt árið 2004 segist Svandís ekki hafa átt sæti í borgarstjórn á þeim tíma en segir að skerpa þurfi á reglum um móttökur á vegum borgarinnar.

Líkt og komið hefur fram á Vísi hélt Óskar móttöku fyrir samflokksmenn sína í nóvember á síðasta ári. Ólafur F. Magnússon gagnrýndi móttökuna á fundi borgarráðs í dag og krafðist þess að Óskar segði af sér. Fram hefur komið að Svandís gerði athugasemdir við móttökuna í forsætisnefnd ásamt Degi B. Eggertssyni.

Hún segir Óskar Bergsson ekki hafa setið umræddan fund og það hafi Ólafur F Magnússon ekki heldur gert.

„Við gerðum alvarlegar athugasemdir sem Vilhjálmur Þ. tók við og gerðum því ráð fyrir að af þessari móttöku yrði ekki en við bókuðum ekki neitt enda er ekki hefð fyrir því. Upplýsingar sem þessar eru einungis lagðar fram fyrir nefndina en ekki er ætlast til þess að þær séu samþykktar eða þeim synjað," segir Svandís og bendir á að forsætisnefnd hafi eftirlitshlutverk með móttökum sem þessum.

Óskar sagði í frétt á Vísi fyrr í kvöld og í Kastljósi Sjónvarpsins að flokkur Svandísar hefði haldið álíka móttöku árið 2004. Aðspurð um þá móttöku segir Svandís:

„Ég kom ekki að þeirri ákvörðun frekar en öðrum á þeim tíma þar sem ég tók ekki sæti í borgarstjórn fyrr en vorið 2006."

Hún segist hinsvegar hafa heyrt af málinu í Kastljósi kvöldsins og hafi í kjölfarið farið að grafast fyrir um það en umrædd móttaka var haldin 16.október árið 2004. Í móttökuplaggi frá þeim tíma segir að um hafi verið að ræða heimsókn fyrir sveitastjórnarráðstefnu VG að sögn Svandísar.

„Ég er búin að fara yfir þetta með Árna Þór [Sigurðssyni] sem þá var forseti borgarstjórnar. Inni í dagskránni er eitthvað sem heitir heimsókn í Ráðhús Reykjavíkur þar sem þessu fólki hefur verið sýnt húsið. Það hefur síðan væntanlega endað með einhverjum veitingum," segir Svandís.

Hún segist ekki vera neinn sérfræðingur í móttökum en samkvæmt þeim upplýsingum sem hún hafi um málið hafi þetta líklega verið einhverskonar skoðunarferð um ráðhúsið.

„Það er hinsvegar alveg á hreinu að fólk verður að vera á bremsunni þegar að svona málum kemur."

Svandís segist ekki hafa verið á staðnum þegar þessi ákvörðun hafi verið tekin en hinsvegar taki hún undir það að skerpa verði á hlutum sem þessum því almenningur hafi rétt á því.

„Við erum jú í vinnu hjá almenningi."