Sykurskattur hækkar íbúðalán um milljarða

Þær hækkanir á óbeinum sköttum, sem Alþingi hefur samþykkt í sumar, hækka höfuðstól verðtryggðra íbúðalána heimilanna um 0,7 prósent, um átta og hálfan milljarð króna.

Greiðslubyrðin hækkar sem þessu nemur, sem hefur í för með sér 700 króna hækkun á mánuði, 8.400 króna hækkun á ári, fyrir fjölskyldu sem greiðir 100.000 krónur á mánuði af verðtryggðu láni.

Hækkun opinberra gjalda á áfengi, tóbak og eldsneyti, sem samþykkt var í maí á að skila ríkis­sjóði fjórum milljörðum í tekjur á ári. Með hækkun vörugjalda á sælgæti og ýmsar matvörur, sem gengu í gildi 1. september, var ætlunin að auka tekjur ríkissjóðs um 2,7 milljarða á ári. Vísitöluáhrif þessara skattahækkana eru samtals um 0,7 prósent, samkvæmt útreikningum Jóns Bjarka Bentssonar, hagfræðings hjá Íslandsbanka.

„Þetta kemur með tvöföldum þunga á þau heimili sem eru með verðtryggð lán,“ segir Jóhannes Gunnarsson, formaður Neytendasamtakanna. Hagstæðara sé fyrir heimilin að ríkissjóður hækki beina skatta eins og tekjuskatt og tryggingargjald, frekar en óbeina skatta eins og virðisaukaskatt og vörugjöld.

Ríkisstjórnin ætlar að auka skattheimtu um 28 til 30 milljarða króna á næsta ári, auk þess sem skorið verður niður í ríkisrekstri um 33 til 35 milljarða. Fram til 2013 þarf ríkissjóður að skapa sér 179 milljarða króna svigrúm til að greiða afborganir og vexti af erlendum lánum.

Guðbjartur Hannesson, for­maður fjárlaganefndar, segir að allar tegundir skattahækkana komi til skoðunar. Um málflutning Neytendasamtakanna segir hann að sá kostnaðarauki sem fylgi beinum sköttum skili sér inn í verðlag og vísitölur þótt það gerist ekki jafnhratt og þegar óbeinir skattar séu hækkaðir.

- pg